Jóga er æfingakerfi sem er um 5000 ára gamalt og á uppruna sinn á Indlandi. Einhver kynni að spyrja hvort þessi aldagömlu fræði ættu við nútímamanneskjuna sem í dagsins önn glímir við ýmist áreiti. Áreiti sem var í flestum tilfellum ekki til þegar æfingakerfi jóga var byggt upp.

Á jóga við í dag?

Staðreyndin er hinsvegar sú að jógafræðin eiga jafnvel við í dag og þá og hugsanlega enn betur. Nú sem aldrei fyrr þarf nútímamaðurinn, sem að öllu jöfnu situr meirihluta dags, að fá útrás fyrir hreyfiþörf sína.

Styrkur, öndun, teygjur og slökun eru allt þættir sem farið er yfir í jógatíma. Gerðar eru æfingar sem reyna á allan líkamann og margir upplifa fyrsta jógatímann sem einskonar uppgötvun á líkamanum þar sem viðkomandi finnur fyrir „nýjum“ vöðvum.

Það sem margir sækja í jógatímana er svo slökunin í lok tímans, en sú stund, eins og jógatíminn reyndar allur, veitir ákveðið frelsi og frí frá amstri dagsins.

Í Jakkafatajóga gerum við einfaldaða útgáfu af hefðbundnum jógatíma. Jakkafatajóga má gera á vinnutíma og í hefðbundnum klæðnaði. Við erum alveg sannfærð um að jóga eigi alltaf og allsstaðar við. Fyrir þá sem kjósa heldur hefðbundna tíma, má benda á Yoga með Eygló í Kópavogi. 

Gefðu þér frí – gefðu þér klukkutíma eða tvo á viku í jóga.  Árangurinn mun ekki standa á sér.

Eygló Egils