Umferðaröryggi á göngu- og hjólastígum

Göngu- OG hjólastígar

Í hvert sinn sem ég fer út að hjóla kviknar hjá mér þörf til að leggja mitt á vogarskálarnar til að umferðarmenning á göngu- og hjólastígum höfuðborgarsvæðisins megi batna. Þar eigum við mikið inni.

Fyrir um tveimur vikum hjólaði ég í fyrsta skipti með einhverjum og við vorum svo óheppnar að lenda í óhappi. Vinkona mín datt og fingurbrotnaði og fór úr liði. Sá sem kom á móti henni datt líka og rifbeinsbrotnaði og meiddist á ökkla. Þarna mættust fjórir hjólarar á þröngum og blindum stíg akkúrat á hálkubletti. Við hin tvö vorum svo heppin að sleppa við samstuð.

Þetta snýst um öryggi

Stígar eru langt í frá öruggir og núna þegar enn á eftir að sópa marga stíga innan Reykjavíkur, þá þarf að gæta sín vel. Laus sandur virkar alveg eins og hálka – hjólafólk missir stjórn. Svo skil ég ekki afhverju sumir stígar beina gangandi umferð yfir á annan helming stígsins en hjólandi yfir á hinn helming stígsins. Merkingar eru yfirleitt bara á stéttinni sjálfri og mást mjög gjarnan af, og það fer því eftir því hvar þú kemur inn á stíginn hvort þú fáir sömu upplýsingar og hinir um þessa skiptingu. Ef allir nota hægri umferðar-regluna alltaf, þá verður enginn svona misskilningur.

Sem betur fer eru hjóla- og göngustígar aðskildir á mörgum leiðum, en gæta þarf varúðar þar sem það er ekki. Sú hugmynd sumra hjólara að “sá sem hraðast fer” eigi meira tilkall til stígsins en aðrir, þarf að útrýma. Það er líka vont þegar fólk gengur með hunda í bandi og bandið er mjög langt og liggur jafnvel þvert yfir stíginn. Foreldrar eiga það til að stoppa á miðjum stíg til að hlúa að börnum sínum. Allt eru þetta stórhættuleg atriði fyrir gott sambýli allra á stígunum.

Ég er með nokkrar tillögur sem myndu bæta umferðarmenningu og öryggi á stígunum til muna.

Örlítil tillitssemi feytir okkur langt

  1. Haltu þig hægra megin. Kenndu börnum þínum að vera hægra megin. Hafðu hundinn hægra megin.
  2. Framúrakstur. Sérstaklega beint til hjólara: varið fólk við, notið bjöllu. Og ég tek ekkert mark á því að bjallan þyngi hjólið. Svo veikburða trúi ég ekki að þú sért. Nú er hægt að kaupa einfaldar bjöllur sem hægt er að smeygja upp á stýrið með teygju. Auðvelt að taka af áður en þú ferð í keppnir þar sem hvert gramm virðist skipta máli.
  3. Hundafólk. Haltu þig hægra megin og hafðu hundinn við hæl. Stígurinn er ekki staðurinn til að láta hundinn ganga lausan eða útum allt í bandi. Það eru önnur svæði í borginni til þess.
  4. Fjölskyldufólk. Haldið ykkur hægra megin. Þegar þið stoppið, ekki stoppa á stígnum. Það er hættulegt fyrir ykkur og aðra.
  5. Gönguhópar. Ekki taka allan stíginn. Haldið ykkur hægra megin og verið tilbúin að fara út í kant til hægri þegar þið heyrið í bjöllunni hjá hjólaranum.
  6. Hlauparar. Þið VERÐIÐ að heyra í umhverfinu ykkar. Þegar hjólarinn er búinn að reyna að vara ykkur nokkrum sinnum við með bjöllunni og þú ert ennþá á miðjunni á stígnum, ekki þá vera hissa ef hjólarinn er smá pirraður þegar þið hittist. Haltu þig hægra megin og hlustaðu eftir umhverfishljóðunum. Þú ert líka þátttakandi í umferðinni, þó þú sért að hlaupa.
  7. Börn. LANGhættulegasta og jafnframt dýrmætasta fólkið á stígunum. Foreldrar: kennið þeim að vera hægra megin á stígnum. Kennið þeim að stoppa í kantinum, því börn eru óútreiknanleg og stoppa yfirleitt bara þá og þegar þeim dettur í hug. Ef þú treystir ekki barninu til að fylgja þessu eftir er ekki endilega sniðugt að barnið sé einsamalt á stígnum.
  8. Hjólarar. Þið eigið ekki stígana. Gefið öðru fólki pláss þegar þið mætist, jafnvel þó það þýði örlítið hægari ferð hjá þér. Sá sem fer hraðast hefur ekki meira tilkall til stígsins en aðrir.

Þurfti bara að koma þessu frá mér!

Með von um bætta umferðarmenningu á stígum borgarinnar.

Eygló fór sjálf að stunda jóga árið 2008 og má segja að hún hafi kolfallið fyrir áhrifunum sem iðkunin hafði á hana. Strax í janúar 2009 hóf hún svo jógakennaranám hjá Guðjóni Bergmann með það að markmiði að dýpka eigin iðkun. Þó ætlunin hafi upphaflega ekki verið að leggja stund á jógakennslu í kjölfarið, þá hóf hún að kenna reglulega tíma snemma sama ár og með tímanum fór hún að kenna sína eigin tíma undir merkjum Yoga með Eygló. Eygló hefur því stundað jógakennslu frá 2009. Árið 2013 stofnaði hún svo Jakkafatajóga með það að markmiði að koma hreyfingu inn í daglega dagskrá almennings og þannig útrýma kyrrsetukvillum.